"III Beynəlxalq Duzdağ Araşdırmaları Konqresi”nin əsas məqsədi duz mədənlərinin təbii müalicə kompleksinin geoloji, tibbi, ekoloji və turizm potensialını elmi müstəvidə araşdırmaq, bu sahədə aparılan son yenilikləri və tədqiqat nəticələrini beynəlxalq alim və mütəxəssislərlə paylaşmaq, multidissiplinar əməkdaşlıq imkanlarını genişləndirməkdir. Konqres həmçinin Duzdağın sağlamlıq turizmi, speleoterapiya və alternativ müalicə üsulları baxımından imkanlarını daha da tanıtmaqla regionun davamlı inkişafına töhfə verməyi hədəfləyir.

Gözlənilən Nəticələr: 

1. Duz mədəni irsinin qorunması və təbliği istiqamətində beynəlxalq əməkdaşlıqları təşviq etmək;
2. Tarix, antropologiya, arxeologiya, geologiya, kimya və digər müvafiq sahələr üzrə duzla bağlı tədqiqat aparan alim və mütəxəssisləri bir araya gətirərək elmi fikir mübadiləsi üçün platforma yaratmaq;
3. Duz mədənlərinin tarixi inkişafı və mövcud vəziyyəti barədə məlumat və təcrübə mübadiləsini stimullaşdırmaq;
4. Duzun sosial, iqtisadi və mədəni inkişafdakı rolu ilə bağlı elmi araşdırmalar aparmaq və nəticələri geniş ictimaiyyətə çatdırmaq;
5. Duz mədəniyyətinə dair maddi mədəniyyət nümunələrinin və mədənlərin mühafizəsinə yönəlik strateji təkliflər hazırlamaq;
6. Gənc tədqiqatçıların diqqətini bu sahəyə cəlb etmək və gələcək nəsillər üçün duzla bağlı elmi-tədqiqat istiqamətlərini müəyyənləşdirmək;
7. Duzla bağlı elmi və mədəni fəaliyyətlərin sənədləşdirilməsi, nəşrlərin hazırlanması və tövsiyələrin formalaşdırılması.

Qeyd:
Konqresə Naxçıvan Muxtar Respublikasından müraciət edən tədqiqatçıların və iştirakçıların oflayn (fiziki) formada iştirakı zəruridir. Xahiş olunur, bu qaydaya əməl edəsiniz və qeydiyyatdan keçərkən oflayn seçim edəsiniz. Bu, tədbirin daha səmərəli şəkildə təşkili və qarşılıqlı əlaqənin gücləndirilməsi məqsədi daşıyır.